د وردګ پوهنتون د رئیس پیغام

وردګ پوهنتون د ملک په کچه د اسلامي ارزښتونو، کلتوري ویښتابه، اقتصادي پرمختګ او نورو علمي برخو کې د لوړو زده­ کړو او علمي کادرونو د روزنې یو تحصیلي او علمي مرکز دی، چې له جوړېدو یې نږدې یوه لسیزه تېرېږي.دغه علمي مرکز د خپل جوړښت په لومړۍ لسیزه کې د لوړو زده کړو وزارت له اصولو او قوانینو سره سم د پنځو پوهنځیو په لرلو سره سلګونه زده کړیالان په افغاني او اسلامي روحیه سمبال ټولنې ته د خدمت لپاره وړاندې کړې دي.علمي بنسټونه د ټولنې په کچه د تحصیل او پرمختګ دنده پر غاړه لري، او د انساني ټولنو د علمي او فکري لوړتیا سرچینې ګڼل کيږي. له همدې کبله وردګ پوهنتون؛ لوړو زده کړو ته لاسرسی یوه اسلامي وجیبه، داخلي اړتیا او د سیمې او نړۍ په کچه سیال حیثیت ته د رسېدو په لاره کې یوازینۍ منطقي او بنسټیزه لاره ګڼي. وردګ پوهنتون د همدغو اسلامي او افغاني اړتیا پربنسټ په ۱۳۹۳ کال کې د یوې ولسي غوښتنې پر بنسټ رامنځته شواو د یوه ولسي عزم  او ملاتړ په پایله کې د داخلي سوداګرو، قومی مشرانو، فرهنګیانو او استادانو په مرسته یې لومړنۍ بېخبناوې پر پښو ودرېدې او فعالیت یې پیل کړ. یاد پوهنتون که څه هم په تېرو لسوکلونو کې د پام وړ لاسته راوړنې لري، چې له نړیوالو اسلامي،علمي او تحصیلي آرونو سره سم په بېخبنایي او مخبنایی برخو کې د پراختیا جوګه شي، او د ملک په کچه د یو روښانه تحصیلي نظام جوړولو لپاره په کمي او کیفي توګه د کادرونو روزنه او د هغوی د علمي او مسلکي ځواک لوړتیا رامنځته کړې ده. وردګ پوهنتون په ټولو کاري برخو کې د دوامدارې عصري کېدنې په موخه په پلان کې لري، چې د استادانو ځاني ارزونې او تحصیلي لوړتیا ته زمینه مساعده کړي او د ملک په کچه محسوسو اړتیاوو ته په کتو سره، د علمي لاسته راوړونو په رڼا کې ټولنیزو اړتیاوو ته د ځواب وینې په موخه خپل پوهنځي او څانګې پر علمي او عصري معیارونو سمبال کړي. وردګ پوهنتون دا خپل رسالت بولي، چې د زده ­کړې، څېړنې او تدریس لپاره آرام، هوسا او په علمي معیارونو برابر چاپېريال رامنځته کړي، ترڅومحصلان په پوره ډاډ او اطمینان سره وکولای شي، په دغه پوهنتون کې خپلو زده کړو ته ادامه ورکړي. د یو ریښتیني اسلامي ټولنې اخلاق د پوهو او زده­ کړو درلودونکو وګړو له فکرونو سرچینه اخلي، له همدې کبله د هر ډول فساد په وړاندې مبارزه کول زموږ فردی او ټولنیزه دنده ده، چې د یو دیني مسؤلیت په توګه به هېڅکله هم له پام ونه لويږي. وردګ پوهنتون هڅه کوي، خپل محصلان پر هغو اخلاقي ځانګړنو سمبال کړي، چې ټولنه یې له موجودیت څخه خوند واخلي او خلک ورته د خپلو اوږو بار نه، بلکې د خپلې مشال لرونکې امسا په سترګه وګوري.

په درنښت

الحاج شیخ الحدیث مولوي محمد عابد "حقاني"

د وردګ پوهنتون رئیس