وردګ پوهنتون ته د لوړو زدکړو وزارت د محصلانو چارو معین مفتی محمد طاهر احمد صیب تشریف راوړ
سه شنبه د جوزا مياشتې ۲۳ مه نېټه وردګ پوهنتون کې د لوړو زده کړو وزارت د محصلانو چارو معين ښاغلي مفتی محمد طاهر احمد تر مشرۍ لاندې د دولتي محصلانو چارو ریس ، د محصلانو د نظارت او ارزونې امر، د محصلانو چارو د خدماتو امر ، د دولتي محصلانو چارو د ډیتابیس امر او ورسره مل پلاوي ته د ښه راغلاست غونډه په يو لړ پرتمينو مراسمو کې ترسره شوه.
غونډه د قرانکريم د سپېڅلو ايتونو په تلاوت سره پيل او ورپسې د پوهنتون محترم رئیس شيخ القران و الحدیث مولوي صفت الله ح. ق.ا.ن.ي له وزارت څخه راغلي پلاوي ته د ښه راغلاست ترڅنګ خوښي څرګنده کړه،چې د کیفیت د لوړاوي او پرمختګ په موخه يې د پوهنتون ارزونې لپاره ګامونه پورته کړي.
همدارنګه د محصلانو چارو معين ښاغلي مفتي محمد طاهر وويل چې له موږ سره مل د ارزونې ټيم به د پوهنتون اکاډميکې او اداري چارې ارزوي تر څو په ياد تحصیلي ارګان کې شته خنډونه او ستونزو ته د حل لارې ولټوي.
ورپسې د دولتی محصلانو چارو ریس ښاغلي استاد حامد یعقوبي د راتګ اجندا له ګډونوالو سره شریکه کړه.
د غونډې په وروستيو کې د پوهنتون علمي او محصلانو چارو مرستيال پوهنيار حميدالله عمري د ياد بنسټ په زېر بینايي، علمي او تشکيلاتي برخو رڼا واچوله او له پلاوي څخه يې د ملاتړ او همکارۍ غوښتنه وکړه.
په پای کې پلاوي د ارزونې تر څنګ د پوهنتون له تدريسي بهير، کتابتون، لابراتوار، نورو پلې شوو پروژو څخه ليدنه وکړه او له محصلینو استادانو سره یی ګډې ناستې تر سره کړې.
